بالاجا قارا بالیق

صمد بهرنگی

چیلله آخشامی ایدی.

قوجا بالیق دریانین دیبینده نوه – نتیجهلرینی اطرافینا توپلاییب اونلارا ناغیل دانیشیردی:

"بیری وارایدی، بیری یوخایدی، بیر بالاجا قارا بالیق وارایدی.

او آناسیایله بیرلیکده کیچیک بیر آرخدا یاشاییردی.

آرخین سویو سال قایالاردان چیخیب درهنین درینلیکینده آخیردی.

بالاجا بالیقلا آناسینین بیر قارا داشین دالیندا و خزهلرین آلتیندا ائولری وارایدی.

گجهلر آنا – بالا بیر یرده خزهلرین آلتیندا یاتیردیلار.

بالاجا بالیق آیی اولرینین ایچینده گورمه حسرتیایله یانیب یاخیردی.

آنا و بالا سحردن آخشاماقدر بیر – بیرینین دالینا دوشوب عوزور، هردن باشقا بالیقلارا قوشولوب سورعتله بالاجا بیر یئرده گزیشیر و گئری قاییدیردیلار.

بالاجا بالیق آناسینین بیرجهسی ایدی.

چونکو اون مین تخومدان فقط بالاجا بالیق ساغ دنیایه گلمیشدی.

بیر نئچه گونایدی کی بالاجا بالیق فیکره دالیر، چوخ آز دانیشیردی.

کؤنولسوز و تنبل - تنبل او طرف – بو طرفه گئدیر، گئری قاییدیردی.

چوخ واختلردا آناسیندان خئیلی گئری قالیردی.

آناسی اولجه ائله بیلیردی کی، سادجه اولاراق بالاسینین کئفی یوخدور، بو کئفسیزلیک تئزلیکله کئچیب گئدهجکدیر.

لاکین … دئمه، قارا بالیقین دردی واریمیش.

بیر گون سحر تئزدن، گونش دوغمامیش، بالاجا بالیق آناسینی یوخودان اویادیب:

"آناجان"، دئدی، "سنه بیر نئچه کلمه سؤزوم وار."

"ئه، سنده واخت تاپدین! دانیشماغی سونرایا ساخلا. یاخشی اولار کی، گزمهیه چیخاق"، دئیه آنا بالیق گؤزلرینی اوووشدوردو و اسنهدی.

"یوخ، آناجان، من داها بئله گزمگی ایستمیرم. گرک بوردان گئدم"، دئیه بالاجا بالیق اعتیراض ائتدی.

آناسی حئیرتله اونا باخیب سوروشدو:

"دوغوردان گئتمک ایستهییرسن؟"

بالاجا بالیق:

"به لی، آناجان، حؤکمن گئتمهلییم!"

آنا بالیق:

"آخی، آلاقارانلیقدا هارا گئتمک ایستهییرسن؟"

بالاجا قارا بالیق:

"ایستهییرم، گئدیم گؤروم، آرخ هارادا قورتاریر. بیلیرسنمی، آناجان، اوزون مودتدیر کی، فیکیرلشیرم، گؤرهسن آرخ هارادا قورتاریر؟ آما ایندییهقدر بیر نتیجهیه گلهبیلمهمیشم. دونن گئجهدن گؤزومو یومماییب هر شئیی گؤتور - قوی ائتمیشم. بئله قراره گلمیشم کی، اؤزوم گئدیب آرخین قورتاراجاغینی تاپیم. بیلمک ایستهییرم باشقا یئرلرده نهوار، نه یوخ."

آنا بالیق:

"منده اوشاق اولاندا بئله فیکیرلره دوشموشم، بالاجان! آرخین نه اولی وار، نه آخیری. ائله گؤردویون نه وارسا اودور. آرخ همیشه آخیر و قورتارمیر."

بالاجا قارا بالیق:

"یوخ، آناجان، بئله دئییل. هر شئیین آخیری وار. مثلن، گئجه سونا چاتیر، هفته، آی، ایل … مگر بونلارین سونو اولمور؟"

بالاجا قارا بالیقین قیزیشدیغینی و دیل - آغیزا قویماییب دانیشدیغینی گؤرن آنا بالیق دئدی:

"بوش - بوش سؤزلری بیر کنارا قوی، دور گزمهیه چیخاق. ایندی دانیشماق یوخ، گزیب دولانماق واختیدیر."

بالاجا قارا بالیق:

"یوخ، آنا، من بئله گزینتیلردن یورولموشام. بوردان اوزاقلاشماق و باشقا یئرلرده نهلر اولدوغونو بیلمک ایستهییرم. بیردن ائله بیلرسن کی، بونلاری منه کیمسه اؤیرهدیب؛ یوخ، آنا، چوخدان بو فیکره دوشموشم. البتته، اوندان - بوندان چوخ شئیلر اؤیرنمیشم. مثلن، بونو باشا دوشموشم کی، بالیقلارین چوخو حیاتلارینی بوش - بوشونا کئچیردیکلریندن گیلئیلهنیرلر. دایم آه - ناله ائدیر، هر شئیدن شیکایتلهنیرلر. بیلمک ایستهییرم گؤروم حیات ائله بیر قاریش یئرده او یان - بو یانا گئدیب قاییتماقدانمی، قوجالیب هئچ نه گؤرمهمکدنمی عیبارتدیر، یوخسا باشقا دونیادا مؤوجوددور؟"

آنا بالیق:

"بالاجا، دلی اولوبسان؟ دونیا! دونیا! او باشقا دونیا نه دئمکدیر؟ دونیا ائله همین دونیادیر کی، بیز یاشییریق، حیاتدا کی، ائله گؤردویون یاشاییشدان عیبارتدیر!"

بو زامان ایری بیر بالیق اونلارین ائوینه یاخینلاشدی "قونشو"، دئدی، "اوشاقلا نیین اوستونده بئله هؤجتلشیرسن؟ دئیهسن، بو گون گزمک فیکرینیز یوخدور؟"

آنا بالیق قونشونون سسینی ائشیدیب جاواب وئردی:

"گؤر، زمانه نئجه دییشیب؟! اوشاقلار اؤز آنالارینا جیب - جیب اؤیرتمهیه باشلاییبلار."

"نئجه مگر؟" دئیه قونشو ایری بالیق سوروشدو.

آنا بالیق:

"گؤر بو جیرتدان هارالارا گئتمک ایستهییر؟! هئی دئییر کی، ایستهییرم گئدیم گؤروم دونیادا نهلر اولور؟ نه بیلیم، آخماق - آخماق سؤزلر!"

قونشو ایری بالیق "بالاجا"، دئدی، "دئ گؤروم سن نهواختدان بئله فیلوسوف و عالیم اولوبسان کی، بیزیم خبریمیز یوخدور؟"

بالاجا بالیق دئدی:

"خانیم، من بیلمیرم سیز عالیم، فیلوسوف نهیه دئییرسینیز؟ هر گون تکرار اولونان جانسیخیجی گزینتیلردن جانا دویموشام. بئله یوروجو حیاتی داها داعوام ائتدیرمک ایستهمیرم. ایستهمیرم کی، بیر ده گؤزومو آچاندا گؤروم سیزین کیمی قوجالمیشام، اؤزو ده گؤز قولاقلاری باغلی بالیقلار کیمی قالمیشام."

قونشو بالیق "وای"، دئدی، "گؤر بو نهلر دانیشیر؟!"

آنا بالیق دیللندی:

"هئچ دوشونمزدیم کی، بیر دنه اوشاغیم اولا، او دا بئله چیخا! بیلمیرم، بالامین قولاغینی کیم دولدوروب."

بالاجا بالیق دئدی:

"هئچ کس منیم قولاقیمی دولدورماییب. آنلاماق اوچون منیم اؤزومون عاغلیم، گؤرمک اوچون ده گؤزوم وار!"

قونشو بالیق بالاجا بالیقین آناسینا دئدی:

"باجی، او پیچ - پیچ دانیشان ایلبیز یادیندادیرمی؟"

آنا بالیق:

"یاخشی یادیما سالدین، یادیمدادیر! تئز - تئز اوشاغیمین یانینا گهلردی. گؤروم اونو گورباگور اولسون!"

بالاجا بالیق دئدی:

"بسدیر، آنا! او، منیم دوستاوم ایدی!"

آنا بالیق:

"بالیقلا ایلبیزین دوستلوغونو ائشیتمهمیشدیک، بونودا ائشیتدیک!"

بالاجا بالیق "منده بالیقلارلا ایلبیزین دوشمنچیلیگاینی ائشیدمهمیشدیم! آما سیز او بیچارهنین باشینی یئدینیز!" دئدی.

قونشو دیللندی:

"بو، کئچمیشین صؤحبتیدیر."

بالاجا بالیق:

"کئچمیشی سیز اؤزونوز یادا سالدینیز!"

آناسی دئدی:

"ائله اؤلمهلیایدی! مگر اوتوروب - دوروب نهلر دانیشدیقلاری یادیندان چیخیب؟!"

"اوندا منی ده اؤلدورون! چونکی منده اونون دئدیکلرینی دئییرم"، دئیه بالاجا بالیق گیلئیلندی.

آخیر کی، نه باشینیزی آغریدیم، سس - کویون صداسی باشقا بالیقلاریدا اورایا چکیب گتیردی.

بالاجا بالیقین سؤزلری هامینی عصبیلشدیرمیشدی.

قوجا بالیقلار بیر - بیر صؤحبته قاریشیب بالاجا بالیقا آجیقلاندیلار:

- ئله دوشونورسن کی، سنه رحم ائدریک؟!

- بیر قولاقبورماسی بسدیر!

قارا بالیقین آناسی اونلارا موقاویمت گؤستردی:

"کنارا چکیلین! اوشاغیما توخونمایین!"

بو زامان بالیقلاردان بیر باشقاسی بالاجا بالیقین آناسینا دئدی:

"خانیم، اوشاغینی لازیمینجا تربییهلندیرمه دیگین اوچون عذاب چکمهلیسن!"

قونشو بالیق سؤزه باشلادی:

"سیزینله قونشو اولدوغوما خجالت چکیرم!"

باشقا بیر بالیق دیللندی:

"نه قدر کی، بو ملونون ایشی … گؤندهرک قوجا ایلبیزین یانینا."

بالیقلار بالاجا قارا بالیقی توتماق ایستهدیلر.

دوستلاری اونو تهلوکهدن اوزاقلاشدیردیلار.

آناسی باش - گؤزونه دؤیور، آغلاییر و دئییردی:

"وای! اوشاغیم الیمدن گئدیر. نه ائدیم؟ باشیما هارانین داشینی سالیم؟"

بالاجا بالیق دئدی:

"آناجان، منیم اوچون آغلاما، گئریده قالمیش بو قوجا بالیقلارین حالینا آغلا."

بالیقلار یئربیئردن چیغیردیلار:

"تحقیر ائلمه!"

"گئت! سونرا پئشمان اولسان، داها بیزدن اینجیمه!"

"بونلار جاوانلیق علامتیدیر. گئتمه!"

"بورالارین نیی پیسدیر؟!"

"باشقا دونیا یوخدور! دونیا ائله گؤردویون بو دونیادان عیبارتدیر. قاییت!"

"آغلینی باشینا ییغیب گئتمکدن ایمتیناع ائتسن، اوندا بیلریک کی، دوغوردان دا باشا دوشن بیر بالیقسان!"

"بیز سنه اؤیرشمیشیک، گئتمه!"

آنا بالیق دولوخسوناراق دیللندی:

"منه رحمین گلسین، بالا! گئتمه!"

بالاجا بالیق اونلارین دئدیکلرینه ائعتینا ائتمهدن اوزاقلاشدی.

همیاشیدلاریندان بیر نئچه سی اونو آرخین گؤلمچهیه تؤکولن یئرینه قدر اؤتوروب گئری دؤندولر.

بالاجا بالیق دوستلاریندان آیریلارکن دئدی:

"گؤروشنهقدر، دوستلار! منی اونوتمایین!"

دوستلار "هئچ اونوداریقمی؟ سن بیزی قفلت یوخوسوندان اویاتدین. بیزه ائله شئیلر اؤیرتدین کی، هئچ یوخوموزا دا گیرمزدی. گؤروشنه قدر، عاغیللی و جسور دوست!" دئدیلر.

بالاجا بالیق شیرریمنان آشاغی سوروشوب آرخا نیسبتن سویو چوخ اولان گؤلمچه یه دوشدو.

اولجه اؤزونو ایتیردی.

سونرا اوزمهیه و گؤلمچهده دولانماغا باشلادی.

بالاجا قارا بالیق بو واختادک بو قدر سویون بیر یئره ییغیشدیقینی گؤرمهمیشدی.

سودا مینلرله چؤمچهقویروق گزیرشیردی.

بالاجا قارا بالیقی گؤرنکیمی اونو مسخرهیه گویدولار:

"بیر بونون تهر - تؤورونه باخ! سن نه مخلوقسان؟!"

بالاجا قارا بالیق آنی اولاراق فیکیرلشیب "خاهیش ائدیرم، تحقیر ائتمگین"، دئدی، "مهنیم آدیم بالاجا بالیقدیر. سیز ده آدینیزی دئیین، تانیش اولاق!"

چؤمچهبالیقلاردان بیری دئدی:

"بیز بیر - بیرریمیزی چؤمچهقویروق چاغیریرییق."

او بیریلری یئردن دئدیلر:

"اصلیمیز، نجابتیمیز وار."

"دونیادا بیزدن گؤزهلی تاپیلماز!"

"سنین کیمی یؤندمسیز دئییلیک!"

بالاجا بالیق اونلارا بئله جاواب وئردی:

"سیزین بو قدر خودپهسند اولدوغونوزو بیلمیردیم. آما نادانلیق اوزوندن بئله دانیشدیغینیز اوچون سیزی باغیشلاییرام."

چؤمچهقویروقلار سسلندیلر:

"دئمهلی بیز نادانیق؟"

بالاجا بالیق دئدی:

"نادان اولماسایدینیز باشا دوشردینیز کی، هر کس اوچون اؤز تهر - تؤورو خوشدور، سیزین هئچ آدینیز دا اؤزونوزونکو دئییل."

چؤمچهقویروقلار اول عصبیلشدیلر.

سونرا بالاجا بالیقین حاقلی اولدوغونو گؤروب سؤزلرینی دییشدیلر: "سن اؤزونو ناحاق یئره یوروسان"، دئدیلر، "بیز سحردن آخشاما قدر دونیانی گزیریک، آما اؤزوموزدن، آتا و آنامیزدان، سایسیز – حسابسیز بالاجا قوردلاردان، بؤجکلردن باشقا هئچ کسی گؤرموروک."

بالاجا بالیق سوروشدو:

"سیز کی، گؤلمچه دن قیراقا چیخا بیلمیرسینیز، دونیانی گزیب دولانماکدان نئجه دم وورا بیلرسینیز؟"

چؤمچهقویروقلار تعجوبلندیلر:

مگر گؤلمچهدن باشقا دا اؤزگه دونیا وار؟

بالاجا بالیق دئدی:

"بس نئجه؟ اؤزونوز فیکیرلشین، گؤرون یاشادیغینیز سو هاردان آخیب و سودان کناردا نهلر وار؟"

چؤمچهقویروقلار دئدیلر:

"سودان قیراقدا دا یئر اولار؟ بیز ایندییه قدر سودان باشقا هئچ یئری گؤرمهمیشیک. ها، ها، ها! سن دلی اولوبسان، ندیر؟!"

بالاجا قارا بالیقیدا گولمک توتدو.

فیکیرلشدی کی، چؤمچهقویروقلاری باشا سالمادان چیخیب گئتسین.

سونرا بئله قراره گلدی کی، اونلارین آنالاریایلهده بیر - ایکی کلهمه دانیشسین.

بالاجا بالیق سوردو:

"آنانیز هارادادیر؟"

بو زامان قورباغانین گور سسی اونو دیکسیندیردی.

قورباغا گؤلمچهنین قیراقینداکی، ایری داشین اوستونده اؤتورموشدو.

سویا باش ووردو، گلیب بالیقین قارشیسیندا دایاندی:

"من بورادایام"، دئدی، "قوللوق؟!"

بالاجا بالیق دئدی:

"مؤحترم خانیم، سالام!"

قورباغا دئدی:

"ئی اصل – نجابتسیز ووجود! نه علامهلیک ائدیرسن؟ بونلاری اوشاق گؤروب آخماق - آخماق دانیشیرسان؟ بیر بئله عؤمور ائلمیشم، گؤرموشم کی، دونیا ائله بو گؤلمچهدن عیبارتدیر. یاخشی اولار کی، ایشینین دالیسینجا گئدهسن، منیم اوشاقلاریمی یولدان چیخارمایاسان."

بالاجا بالیق دئدی:

"یوز ایلده عؤمور ائلهسن، یئنه گئری قالمیش، نادان قورباغا کیمی قالاجاقسان!"

قورباغا حیرصلندی و بالاجا قارا بالیقین اوستونه جومدو.

بالاجا قارا بالیق جلد حرکت ادیب، ایلدریم سورعتایله اورانی ترک ادرکن زیق – زیمریقی لاخلادیب باتاقلیقداکی یوخویا دالمیش کیچیک سورونگن قورتلاریندا یوخوسونو قاچیرتدی.

دره اَیری - اویرو ایدی.

آرخین سویودا چوخلامیشدی.

داغاین باشایندان باخاندا درهنین سویونو ائنلی، آغ ایپه اوخشاتماق اولاردی.

درهنین بیر یئرینده داغدان قوپوب آرخا دوشموش ایری بیر داش سویو ایکی یئره بؤلوردو.

ایری بیر کرتنکلهده قارنینی داشا سؤیکهمیشدی.

گونشین حرارتیندن لذت آلیر، سویون تکینده اوولادیغی قورباغانی یئین ایری، یومورو خرچنگه تاماشا ائدیردی.

ائله بو آن اورادان اوزوب کئچمک ایستهین بالاجا بالیقین گؤزلری خرچنگه ساتاشدی.

او، برک قورخدو و اوزاقدان خرچنگه سالام وئردی.

خرچنگ بالاجا بالیقی گؤرونجه "نه ادبلی بالیقسان"، دئدی، "گل قاباغا. بالاجا، قاباغا گل!"

بالاجا بالیق "من دونیانی گزمهیه گئدیرم"،دئیه خرچنگه جاواب وئردی، "جانابینیزین یئمینه چئویریلهمک ایستمیرم!"

خرچنگ دئدی:

"نییه بئله بدبینسن، قورخاقسان، بالاجا بالیق؟"

بالاجا بالیق دئدی:

"نه بدبینام، نه ده قورخاق. گؤردوکلریمی دئییرم."

خرچنگ دئدی:

"چوخ یاخشی، ایندی دئ گؤروم گؤزلرین نه گؤردو و عقلین نه کسدی کی، سنی اوولایاجاغیمی خیالینا گتیردین؟

بالاجا بالیق دئدی:

"اؤزونو بیلمهمزلییه وورما!"

خرچنگ دئدی:

"بیلیرم، قورباغانین حرکتلرینه ایشاره ائدیرسن. لاپ اوشاقسانمیش کی، بابا! قورباغالارلا آرام اولمادیقی اوچون اونلاری اوولاییرام. اونلار ائله خیال ائدیرلر کی، دونیانین یئگانه مخلوقلاریدیلار و هامیدان خوشبختدیلر. ایستهییرم اونلاری باشا سالام کی، دونیا کیمین الیندهدیر. سن ایسه قورخما، قاداسی! گل قاباغا. قورخما، گل!"

خرچنگ بو سؤزلری دئییب یانلارینی باسا - باسا بالاجا بالیقا طرف یئریدی.

خرچنگ ائله گولمهلی یئریییردی کی، بالیقی ایختییارسیز اولاراق گولمک توتدو. "ای یازیق"، دئدی،"سن هئچ یئریمگیده باجارمیرسان. هاردان بیلیرسن دونیا کیمین الیندهدیر؟!"

بالاجا بالیق خرچنگدن آرالاندی.

بو زامان سویون اوزرینه کؤلگه دوشدو.

گؤزلهنیلمز ضربهدن خرچنگ صندلهیه – صندلهیه سویون دیبینه باتدی.

خرچنگی بو حالینی گؤرن کرتنکلهنی گولمک ائله توتدو کی، آز قالدی سوروشوب سویا دوشسون.

خرچنگ ایسه آرتیق سویون اوزونه چیخا بیلمهدی.

بالاجا بالیق گؤردو کی، سویون کناریندا بالاجا بیر چوبان دایانیب اونا و خرچنگه تاماشا ائدیر.

قویون - کئچی سوروسوده سویا یاخینلاشدی.

"مع - مع! بع - بع!" سسلری درهنی باشلارینا گؤتوردو.

بالاجا قارا بالیق سورونو سو ایچیب قورتارانا قدر گؤزلهدی.

سورو گئدندن سونرا کرتنکلهنی سسلهییب "کرتنکلهجان"، دئدی،"من آرخین قورتاراجاغینی آختارماغا گئدن بالاجا قارا بالیقام. سن بیلیکلی، ذکالی حئیوانسان. بونا گؤرهده سندن بعضی شئیلری سوروشماق ایستهییرم."

کرتنکله دئدی:

"گؤیلون هر نه ایستهییر، سوروش."

بالاجا بالیق دئدی:

"یولدا منی نرهبالیقلا، ساققا قوشوایله، بالیقودان قوشلا چوخ قورخودوبلار. بونلار حاقیندا بیر شئی بیلیرسنسه منه دئ!"

کرتنکله دئدی:

"نره بالیقلار و بالیقودانلار بو طرفلرده تاپیلمازلار. خوسوسیله نره بالیقلار. چونکی اونلار دریادا یاشاییرلار. آما ساققا قوشونا ائله بو هندورده راست گلمک اولار. مباده آلدانیب کیسهسینین ایچریسینه گیررسن.

"کیسه ندیر؟" بالاجا بالیق اونون سؤزونو کسیب سوروشدو.

کرتنکله دئدی:

"ساققا قوشونون بوغازینین آلتیندا خئیلی سوتوتان کیسه وار. بازن تجروبهسیز، خام بالیقلار سودا اوزن قوشون کیسهسینه گیریب بیرباشا قارنینا گئدیرلر. ساققا قوشو توخ اولاندا بالیقلاری کیسهسینده احتیاط ساخلاییر."

بالاجا بالیق دئدی:

"دئمهلی، اونون قارنینا گئدندن سونرا خیلاص اولماق اوچون چاره یولاو یوخدور؟"

کرتنکله دئدی:

"یوخدور. کیسهنی پارچالاماقدان باشقا هئچ بیر یول یوخدور. سنه بیر خنجر وئررم. ساققا قوشونون چنگینه دوشنده دئدیگیم کیمی ائدرسن."

کرتنکله قایاداکی یاریغا سورونوب خنجرله قاییتدی.

بالاجا بالیق خنجری آلیب دئدی:

"کرتنکله، سن چوخ مئهریبانسان، بیلمیرم سنه نئجه تشککور ائدیم؟"

کرتنکله دئدی:

"جانیم، تشککور نهیه لازیمدیر، منیم بئله خنجریم چوخدور، سنین کیمی عاغیللی بالیقلارا باغیشلاییرام."

بالاجا بالیق دئدی:

"مگر مندن قاباقدا بورادان کئچن اولوب؟"

کرتنکله دئدی:

"چوخلاری کئچیب. ایندی اونلار اؤزلری اوچون بؤیوک دسته دوزلدیبلر و بالیقچیلاری بزدیرمیشلر."

بالاجا قارا بالیق دئدی:

"باغیشلائین، سوز سوزی گتیریر. اونلارین بالیقچیلاری نجه بزدیرمهلری حاقدا ممکنسه بیر آز گنیش بیلگی ورین."

کرتنکله دئدی:

"چونکو اونلار بیربیرینن باهمدیلر، بالیقچیلار بالیق توتماقیچین دریایا تور آتاندا تورو یئرتیب بالیقچیلارین اللریندن چیخاریب و دریانین دیبینه آپاریللار."

کرتنکله بونلاری دئییب قولاقینی داشداکی یاریغا دایادی: "آدی، ساغ اول" دئدی، "بالالاریم یوخودان آییلدیغی اوچون گئتمه لییم."

کرتنکله یاریغا گیردی.

بالاجا قارا بالیق ایسه چارهسیز قالیب یولا دوشدو.

هئی اؤز - اؤزونه سوال وئریردی:

"دوغوردانمی آرخ دریایا تؤکولور؟ ساققا قوشون گوجو ائله منه چاتسین؟! بالیقودان قوشون بیزیمله نه دوشمنچیلیگی وار؟"

بالاجا بالیق اوزه - اوزه گئدیر و فیکیرلشیردی.

یولبویو تزه شئیلر گؤرور، اؤیرهنیردی.

شلالهنین باشی اوسته آخماسیندان هزز آلیر، یئنیدن عوذوردو.

کورگینده گونشین حرارتینی هیسس ائدیر و مؤحکملهنیردی.

بیر یئرده بیر جیرانا راست گلدی کی تهلهسه تهلهسه سو ایچیردی.

بالاجا بالیق سئوینهرک دئدی:

"گوزل جیران! نییه بئله تهلهسیرسن؟"

جیران دئدی:

"اوچو آرخامدادیر. بالدیریما بیر باخ. گوله دئیمیش."

بالاجا بالیق گوله یاراسینی گوره بیلمهدی، آنجاق جیرانین آخسایاراک قاچماسیندان آنلادی کی دوغرو دئیر.

بیر یرده باغلارین کیزمار گونشین آلتیندا مورغولهمهلرینی گوردو.

باشقا بیر یرده ایسه ککلیکلرین هوسله، سوگیله ماهانی سویلهمهلرینه تانیق اولدو.

داغلاری بوروموش چیچکلرین قوخوسو هوادا دالقالاناراک سویا قاریشیردی.

او، سونرا ائله بیر یئره چاتدی کی، بورادا دره ائنلهنیر، سو ایسه کوللوقلارین آراسیندان آخیب گئدیردی.

بالاجا بالیق سویون چوخالماسیندان لذت آلیردی.

خئیلی گئدندن سونرا او، چوخلو بالیقا راست گلدی.

آناسیندان آیریلاندان بری بالیق گؤرمهمیشدی.

بیر نئچه ریزهبالیق اونو دؤورهیه آلدی و سوروشدو:

"ئله بیل غریبسینیز؟"

قارا بالیق دئدی:

"بهلی، غریبهم. اوزاق یئردن گلیرم."

ریزه بالیقلار دئدیلر:

"هارا گئتمک فیکریندهسن؟"

قارا بالیق دئدی:

"آرخین قورتاردیغی یئری تاپماغا گئدیرم."

ریزه بالیقلار دئدیلر:

"هانسی آرخین؟"

قارا بالیق دئدی:

"بو آرخ که ایچینده اوزوروک."

ریزه بالیقلار دئدیلر:

"بیز بونا آرخ یوخ، چای دئییریک."

قارا بالیق هئچنه دئمهدی.

ریزه بالیقلاردان بیری دیللندی:

"خبرین وار کی، ساققا قوشو یولو کسیب؟"

قارا بالیق دئدی:

"خبریم وار، بیلیرم."

باشقا بیر ریزه بالیق سوروشدو:

"ونودا بیلیرسن کی، ساققا قوشونون نه گئنیش کیسهسی وار؟"

قارا بالیق دئدی:

"ونودا بیلیرم."

باشقاسی دئدی:

"بونلاری بیله - بیله یئنه گئتمک فیکریندهسن؟"

قارا بالیق دئدی:

"بهلی، بوتون بونلاری بیلیرم و گئتمهلییم."

بالیقلار آراسیندا سس یاییلدی کی، اوزاق یوللاردان گلمیش بالاجا قارا بالیق چایین قورتاراجاغینی تاپماق ایستهییر و ساققا قوشونداندا قورخمور.

ریزه بالیقلاردان بیرنئچهسی بالاجا قارا بالیقلا گئتمک ایستهدی، لاکین بؤیوکلرین قورخوسوندان سسلرینی چیخارتمادیلار.

حتی اونلارین بیرنئچهسی بالاجا قارا بالیقا یاناشیب قیمیلداندی:

"ساققا قوشو اولماسایدی، بیزده سنینله گئدردیک."

چایین قیراغیندا بیر کند وارایدی.

کندین آروادلاری و قیزلاری چایین ایچینده قاب - قاشق و پالتار یویوردولار.

بالاجا بالیق اونلارین سس - کویونه بیر خئیلی قولاق آسدی و اوشاقلارین ایسلانمیش بدنلرینه تاماشا ائتدی، سونرا یولا دوزلدی.

او قدر گئتدی کی، آخشام اولدو.

بالاجا بیر داشین آلتینا گیریب یاتدی.

گئجهیارسی آییلدی و گؤردو کی، آی سویا دوشوب، هر یئری ایشیقلاندیریر.

بالاجا قارا بالیق آیی چوخ ایستهییردی.

گئجهلر آی سویا دوشنده یووادان چیخیب اونونلا بیرنئچه کلهمه دانیشماق حسرتیندیدی.

آما هر دفعه آناسی آییلیب اونو یوواسینا دارتار و یئنیدن یاتیرداردی.

بو دفعه بالاجا بالیق آیین قارشیسینا چیخدی:

"سالام، ائی منیم گؤیچک آییم!"

آی دا بالاجا قارا بالیقی مئهریبانلیقلا قارشیلادی:

"سالام، منیم بالاجا قارا بالیقیم! سن هارا، بورا هارا؟"

بالیق دئدی:

"دونیانی سیاحته چیخمیشام."

آی دئدی:

دونیا چوخ بؤیوکدور، سن هر یئری گزه بیلمزسن."

بالیق دئدی:

"عیبی یوخدور، باجاردیغیم یئره قدر گئدهجگم."

آی دئدی:

"اورگیم چوخ ایستهییردی کی، سحره قدر یانیندا قالام، آما بؤیوک بیر قارا بولود منه طرف گلیر. قورخورام ایشیغیمین قاباغینی کسسین."

بالیق دئدی:

"ای قشنگ آی، سنین ایشیغینی چوخ سئویرم. اورگیم ایستهییر کی، نورون همیشه یولوما ایشیق ساچسین."

آی دئدی:

"منیم بالیقیم، دوزونو آختارسان منیم ایشیقیم یوخدور، ایشیقی منه گونش وئریر، منده اونو یئره ساچیرام. بیلیرسنمی کی، آداملار یاخین گلهجکده اوچماق، گلیب منیم اوزریمه دوشمک آرزوسوندادیرلار؟"

بالیق دئدی:

"بو مومکون دئییل!"

آی دئدی:

"دوزدور، بو چوخ چتین ایشدیر، آنجاق اینسان اؤز ایستهدیگین ... ."

آی سؤزونو قورتارا بیلمهدی.

قارا بولود گلیب اونون اوزونو اؤرتدو، یئره قارانلیق چؤکدو.

قارا بالیق یئنهده تک - تنها قالدی.

بیرنئچه دقیقه حئیرت ایچریسینه قارانلیغا باخدی.

سونرا داشین آلتینا چکیلیب یاتدی.

صبتئزدن آییلاندا باشینین اوستونده پیچ – پیچلا دانیشان بیرنئچه ریزه بالیق گؤردو.

اونلار قارا بالیقین یوخودان آییلدیغینی گؤروب دئدیلر:

"صاباحین خئییر!"

قارا بالیق اونلاری تانیدی "صاباحینیز خئییر اولسون!" دئدی. "نهایت، آردیمجا گلیب، من دیین یولا دوشدونوز؟"

ریزه بالیقلاردان بیری "بهلی"دئدی، "آنجاق هلهده قورخو جانیمیزدان چیخماییب."

بیر باشقا ریزه بالیق "ساققا قوشونون فیکری بیزی راحات بوراخمیر" دئیه دیلندی.

قارا بالیق "سیز چوخ فیکیرلشیرسینیز. هر شئیه فیکیرلشمک، اؤزوده بیر دفعهیه فیکیرلشمک دوز دئییل. یولا دوشنکیمی قورخو بیزی ترک ائدهجکدیر" دئیه جاواب وئردی.

بیرلیکده یولا دوشمک ایستهدیلر.

گؤردولر کی، دؤورهلرینده کی سو یوخاری قاخدی، باشلاری اوزرینه اؤرتوک چکیلدی.

هر یئر قارانلیقلاشدی، قاچماغا ایمکان قالمادی.

قارا بالیق او ساعات باشا دوشدو کی، ساققا قوشونون کیسسهسینه دوشوبدور.

بالاجا قارا بالیق دئدی:

"دوستلار، بیز ساققا قوشونون کیسسهسینه دوشموشوک، لاکین خیلاص اولماق اوچون یول وار."

ریزه بالیقلار آغلاییب آه - زار ائتمکه باشلادیلار:

"آرتیق بیزم قاچماقا یولوموز یوخدور! تقصیر سندهدیر. بیزی یولدان چیخاردین!"

باشقا بیر ریزه بالیق دئدی:

"ایندی بیزیم هامیمیزی "قورت" ائلهییب اوداجاق."

قورخونج بیر قهقهه سسی ائشیدیلدی.

بو ساققا قوشو ایدی، گولوردو و گوله - گوله دئییردی:

"ریزه بالیقلار نئجهده گیریمه گئچیب! ها! ها! ها! ها! سیزین حالینیزا یانیرام، هئچ اورگیم گلمیر، سیزی "قورت" ائلهییب اودوم. ها! ها! ها! ها!"

ریزه بالیقلار یالوارماقا باشلادیلار:

"حضرتی - آقایی ساققا قوشو، سنین تعریفینی چوخدان ائشیتمیشیک، لوطف ائدیب موبارک دیمدیگینیزی بیر قدر آرالاسایدینیز بورادان خیلاص اولوب موبارک ووجودونوزا دوعاچی اولاردیق."

ساققا قوشو دئدی:

"من هله بو ساعات سیزی "قورت" ائلهییب اودماق فیکرینده دییلم. کیسهمده احتیاط بالیقلار وار، بیر قارنیمین آلتینا باخین."

کیسهنین آشاغی حیصهسینده اییلنمیش بیرنئچه ریزه بالیق وارایدی.

ریزه بالیقلار بیر سسله دئدیلر:

"حضرتی - آقایی ساققا قوشو، بیزیم گوناهیمیز یوخدور، بو بالاجا قارا بالیق بیزی یولدان چیخاردیب."

بالاجا بالیق "قورخاقلار!" دئدی. "سیز ائله خیال ائدیرسینیز کی، یالوارماقلا بو حیلهگر رحمدیللیک ائدیب سیزی بوراخاجاق؟"

ریزه بالیقلار قورخویا دوشوب دئدیلر:

"هئچنه دانیشدیغینیدا بیلمیرسن. ایندی گؤرهسن کی، حضرتی - آقایی ساققا قوشو بیزی نئجه باغیشلایاجاق و سنی نئجه "قورت" ائلیهجکدیر!"

ساققا قوشو دیللندی:

"دوغرودور، سیزی باغیشلاییرام، آنجاق بیر شرطله!"

ریزه بالیقلار دئدیلر:

"شرطینیزی بویورون، قوربان!"

ساققا قوشو دئدی:

"آزادلیغینیزی بو بوشبوغاز بالیقی اؤلدورمکله الده ائده بیلرسینیز."

بالاجا قارا بالیق بیر قدر دالا چکیلیب ریزه بالیقلارا "اینانمایین"،دئدی، "بو حیلهگر بیزی بیر - بیریمیزین جانینا سالماق ایستهییر، منیم باشقا فیکریم وار!"

ریزه بالیقلار آزادلیغا چیخماق ایستگیایله بالاجا قارا بالیقین دئدیکلرینه قولاق آسمادیلار، قالخیب اونون اوستونه دوشدولر.

بالاجا بالیق یاواش - یاواش آرخایا چکیلیب "قورخاقلار!" دئدی، "هر حالدا گیره دوشموسونوز، قاچماغادا یولونوز یوخدور. منهده کی، گوجونوز چاتماز!"

ریزه بالیقلار دئدیلر:

"بیز آزادلیقا چیخماق ایستهییریک، اونون اوچونده سنی اؤلدورمهلیگیک!"

قارا بالیق دئدی:

"آغلینیزی باشینیزا ییغین! منی اؤلدورسنیز ده قاچماق اوچون یول تاپا بیلمیهجکسینیز. حیلهگر قوشا اینانمایین!"

ریزه بالیقلار دئدیلر:

"سن اصلا بیزیم فیکریمیزی چکمیرسن، بو سؤزلری اؤز جانینی قورتارماق اوجون دئییرسن!"

قارا بالیق دئدی:

"ائله ایسه قولاق آسین، سیزه نیجات یولو گؤستریم. من اؤزومو اؤلولویه ووروب اؤلو بالیقلارین ایچریسینده گیزلنهجگم. گؤرک ساققا قوشو سیزی آزاد ائدهجکدیرمی؟! اگر سؤزومه قولاق آسماسانیز بو خنجرله هامینیزی قیراراق، قوشوندا کیسسهسینی پارچالاییب چیخارام. سیز ایسه ... ."

ریزه بالیقلاردان بیری اونون سؤزون کسیب "داها بسدیر!" دئدی، "من بو سؤزلره اینانماق ایستمیرم." و، بو سؤزلری دئیه - دئیه آغلاماغا باشلادی."

بالاجا قارا بالیق اونون آغلادیغینی گؤروب دئدی:

"بو آناسینین ناز - ناز بالاسینی نییه یانینیزا سالیب گتیریبسینیز؟"

او، خنجرینی چیخاریب بالیقلارین اوستونه جومدو.

ریزه بالیقلار چارهسیز قالیب بالاجا قارا بالیقین تکلیفینی قبول ائتدیلر.

یالاندان بیر – بیرلریایله دالاشماغا باشلادیلار.

بالاجا قارا بالیق اؤزونو اؤلولویه ووروب اوزاندیقدا اونلار یوخاری قالخدیلار "حضرتی - آقایی ساققا قوشو"، دئدیلر، "فوضول قارا بالیقی اؤلدوردوک."

ساققا قوشو گولدو "چوخ یاخشی ایش گؤردونوز"، دئدی، "بونون عوضینه سیزین هامینیزی دیری - دیری اوداجاغام، قارنیمدا ایسته دیگینیز قدر گزرسینیز."

ریزه بالیقلار ماجال تاپمامیش بیر آنداجا ساققا قوشو اونلاری اوددو.

قارا بالیق ایسته جلد خنجرینی چکیب مؤحکم ضربهایله قوشون کیسهسینی ییرتدی و دئشیکدن چیخیب قاچدی.

ساققا قوشو آلدیغی ضربهنین آغریسیندان فریاد قوپاردی، باشینی سویا سالیب بالاجا قارا بالیقی یئنیدن توتماق ایستهدی، لاکین گوجو چاتمادی.

قارا بالیق گئتدی، گئتدی و گئتدی.

گونورتا ایدی.

آرتیق نه داغ گؤرونوردو، نه دره.

چای آخیب گئنیش دوزنلیکدن کئچیردی.

چایین ساغ – سولوندان تؤکولن کیچیک چایلار اونون سویونو قات - قات آرتیریردی.

قارا بالیق سویون چوخلوغوندان لذت آلیردی.

بیردن آییلیب گؤردو کی، سویون دیبی گؤرونمور.

او یان - بو یانا باش ووردو، هئچ یانا چیخا بیلمهدی.

آز قالا غرق اولموشدو.

اورگی ایستهدیگی قدر اوزندن سونرادا الی بیر یانا چاتمادی.

بیردن گؤردو کی، بورنوندا میرواری دیشلری اولان اوزون بیر حئیوان ایلدیریم سورعتایله اونا هوجوم ائدیر.

بالاجا بالیق هیسس ائتدی کی، حئیوان او ساعات اونو پارچا - پارچا ائدهجکدیر.

چاپالاییب تئز سویون اوزرینه قالخدی.

بیر موتدتدن سونرا سویون آلتینا ائندی.

یولون یاریسیندا بیر سورو بالیقا راست گلدی.

مینلرله، اونمینلرله بالیق.

اونلاردان بیرینی ساخلاییب سوروشدو:

"قارداش، غریبهم، اوزاق - اوزاق یئرلردن گلیرم. دئیین گؤروم بورا هارادیر؟"

بالیق، یولداشلارینی سسلدی و دئدی:

"باخین! بیری داها ... ."

سونرا دؤنوب قارا بالیقا دئدی:

"یولداش، بیزیم دریایا خوش گلیبسن!"

بالیقلاردان بیری دئدی:

"بوتون چایلار و آرخلار بورا تؤکولور. البتته بعضیلریده باتلاقلارا گیریر."

باشقا بیر بالیق دئدی:

"هر واخت ایسترسن بیزیم دستهمیزه گیره بیلیرسن."

بالاجا قارا بالیق کی دریایا چاتدیغیچون سوینیردی دئدی:

"یاخشیدی کی اول بیرآز گزیم، سونرا گلیم سیزین دستهنیزه قاتیلیم. اورگیم ایستییر کی بو دفه بالیقچیلارین تورونو ییرتیب و دریانین دیبینه چکدیکینیزده، منده سیزین آرانیزدا اولوم."

باشقا بیر بالیق ایسه "تزلیکله اوز ایستهدیینه چاتارسان. ایندی گئت بیر آز گز. سویون اوزونه چیخماق ایستهسن بالیقوداندان احتیاطلی اول. بو گونلر او هئچ کسدن قورخمور. هر گون دؤرد - بئش بالیق اوولانماسا یاخامیزدان ال چکمیر"، دئدی.

بالاجا بالیق دریا بالیقلارین دستهسیندن آیرلدی و اوزو اوزمهیه باشلادی.

آز سونرا دنیزین اوستونه چیخدی.

بالاجا قارا بالیق قیزمار گونشین یاندیریجی حرارتینی اؤز کورگینده هیسس ائدیر، بوندان لذت آلیردی.

آرام اوزور، اؤز- اؤزونه دئییردی:

"اؤلوم چوخ آسان ایندی منیم سوراغیما گلهبیلر، آمما یاشاییجاغا قدر، اولماغا یاخین اولمیاجاغام. البتته اگر بیرواخت چاره سیز اولومه راست گلسم – کی راست گلهجاغام – مهم دئیل، بو مهمدیر کی منیم یاشاماغیم و یا اولماغیم باشقالارین یاشانتیسیندا نه اثری اولاجاق."

بالاجا قارا بالیق فیکیر و دوشونجهلرینی سونا چاتدیرا بیلمهدی.

بالیقودان گلدی، اونو گؤتوروب آپاردی.

بالاجا بالیق بالیقودانین اوزون دیمدیکلری آراسیندا چاپالاسادا اؤزونو خیلاص ائدهبیلمهدی.

بالیقودان دیمدیگیایله اونون بئلینی ائله برک سیخیردی کی، آز قالا جانی چیخاجاقدی.

دیگر طرفدنده، بیر بالاجا بالیق سودان قیراقدا نهقدر ساغ قالابیلردی؟

اؤلومون قاباغینی آلماقاوچون لاپ بالیقودانین قارنینا گئتمهیه راضیایدی، آخی، اوراداکی نمیشلیکدن ایستیفاده ائدهبیلردی.

بونا گؤره بالیقودانا دئدی:

"نه اوچون منی ساغ - ساغ اودمورسان؟ من او، بالیقلاردانام کی، اؤلندن سونرا بوتون بدنیم زهره دؤنر."

بالیقودان هئچنه دئمهییب فیکره گئتدی:

"آی حوققاباز، ایستهییرسن منی دیللندیریب آرادان چیخاسان؟"

ساحیل گئتدیکجه یاخینلاشیردی.

قارا بالیق " قورویا چاتساق داها ایش بیتدی" دئیه دوشوندو و نهایت بالیقودانا دئدی:

"بیلیرم منی بالالاریناوچون آپاریرسان. آما ساحیله چاتانا قدر اؤلهجگم، بدنیم زهر کیسهسینه دؤنهجک، بالالارینا نییه رحمین گلمیر؟"

بالیقودان بیر آنلیق فیکره گئتدی:

"احتیاط یاخشی شئیدیر. هر احتیمالا قارشی سنی اؤزوم یئییم، بالالاریماوچون ایسه باشقا بالیق توتوم … آمما بیردن بو، بیر کلک ایشلهدر؟ یوخ، جانیم، هئچ بیر کلک ایشلهدهبیلمز."

بالیقودان گؤردو کی، قارا بالیق سوستالیب جاندان دوشور.

اؤز - اؤزونه دئدی:

"دئیهسن اؤلدو، آرتیق اونو اؤزومده یئیهبیلمرم. ظریف و یوموشاق بالیغی حارام ائتدیم."

آنجاق یئنه قارا بالیقی سسلهدی کی دئسین:

"آی بالاجا، ههله یاریجانیندا وار کی سنی یئیهبیلیم؟"

آمما بالیقودان سوزونو بیتیره بیلمهدی.

دیمدیکلرینی آرالایان کیمی قارا بالیق اونون آغزیندان خیلاص اولدو.

بالیقودان آلداندیغینی گؤروب، بالاجا قارا بالیقی تعقیب ائتدی.

قارا بالیق هاوادا ایلدیریم کیمی شیغیییب آشاغی دوشوردو.

دریا سویونا یئتیشماغیچون اوزونن گئتمیشدی و گورو آغزینی آچیب دریانین روطوبتلی هاواسینی اودوردو.

نهایت سویا دوشدو و کؤکسونه یئنی نفس دولدو.

بالیقوداندا ایلدیریم سورعتیایله شیغیییب آرخاسینجا سویا باش ووردو، آمان وئرمهییب یئنهدن بالیقی اوددو.

قارا بالیق بیر خئیلی واخت باشینا نه گلدیگینی هیسس ائتمهدی.

بیرجه اونو هیسس ائتدی کی، هر یئر قارانلیق و روطوبتلیدیر و چیخیش یولو ایسه یوخدور.

ائله کی، گؤزلری قارانلیغا آلیشدی، آغلاییب آناسینی ایستهین بیر ریزه بالیق گؤردو.

قارا بالیق یاخینلاشیب اونا نصیحت وئردی:

"قالخ آیاغا، آی بالاجا ! باشینا چاره قیلماق حاقیندا فیکیرلش، آغلاماقدان، آنانی چاغیرماقدان بیر شئی چیخماز."

ریزه بالیق سوروشدو:

"سن کیمسن؟ مگر گؤرمورسن گئت - گئده محو اولورام؟ آنا … آی آنا، هارداسان، ایمدادیما چات! داها بالیقچینین تورنو دریا دیبینه گوتورماغا من سنن گلهبیلمیهجاغام."

قارا بالیق "داها بسدیر، جانیم"، دئدی، "سن بوتون بالیقلاری روسوای ائلهدین."

ریزه بالیق آغلاماغینا آرا وئرن کیمی قارا بالیق دئدی:

من بالیقودانی اؤلدوروب بوتون بالیقلاری آزاد ائتمک فیکریندیم. سنی اونون قارنیندان خیلاص ائدندن سونرا بونو حیاتا کئچیرمک ایستهییرم."

ریزه بالیق دئدی:

"سن اؤزون اؤلومله البیاخاسان. بالیقودانی نئجه اؤلدوره بیلرسن؟"

قارا بالیق خنجرینی گؤستریب دئدی:

بونلا اونون قارنینی جیراجاغام. هلهلیک منه قولاق آس، گؤر نه دئییرم. من بالیقودانین قارنیندا او طرف - بو طرفه گئدیب اونون عصبلریایله اوینایاجاغام. بو زامان او منی مسخرهیه قویوب باشلایاجاق قهقهه چکیب گولمهیه، ائله کی، دیمدیکلرینی آچیب گولمهیه باشلادی، جلد اؤزونو باییرا آت."

ریزه بالیق دئدی:

"بس سن؟"

قارا بالیق دئدی:

"منیم فیکریمی چکمه. بو بدجینسی اؤلدورمهمیش باییرا چیخاسی دئییلم."

قارا بالیق بو سؤزلری دئییب بالیقودانین قارنیندا او طرف - بو طرفه وار - گل ائتمهیه باشلادی.

ریزه بالیق، بالیقودانین میعدهسینین قاپیسیندا حاضیر آماده دورموشدی.

همن کی بالیقودان آغزینی قاهقاه گولماغیچون آشدی، ریزه بالیق ایسه اونون آغزیندان باییرا آتیلدی و قاشدی و سویا دوشدو.

ریزه بالیق چوخ گؤزلهدی، آمما قارا بالیقدان بیر خبر اولمادی.

بیردن گؤردو کی، بالیقودان هاوادا مایاللاق ووروب فریاد قوپاریر، نهایت، ال - ایاق وورماغا باشلادی، آششاقیا گلدی و شاپپیلتیایله سویا دوشدو و یئنه بیر قدر چاپالایاندان سونرا طاقتدن دوشدو.

لاکین بالاجا قارا بالیقدان یئنهده خبر چیخمادی و ایندییه قدرده بیر سس - سوراق یوخدو ... ."

بورادا قوجا بالیق ناغیلینی بیتیردی و اونایکیمین اوشاقلاری و نوهلرینه دئدی:

"داها یاتماق واختیدیر، بالالاریم، گئدین یاتین!"

اوشاقلار و نوهلر اوندان سوروشدولار:

"ننهجان، آخی سن ریزه بالیقین باشینا سونرا نهلر گلدیگینی دئمهدین؟"

قوجا بالیق دئدی:

"او دا صاباحکی گئجهیه قالسین، بالالاریم. آرتیق یاتماق واختیدیر. گئجهنیز خئیره قالسین!"

اونبیرمین دوققوزیوز دوخساندوققوز بالاجا بالیق بیرآغیزدان "گئجهنیز خئیره قالسین!" دئدی و یاتماغا گئتدیلر.

ننهنیده یوخو آپاردی، آمما بالاجا قیزیل بالیق ایسه نهقدر چالیشدیسا یاتابیلمهدی.

صوبحهدهک دریا بارهسینده فیکیرلشدی ... .